Wag kami

MALIGALIG sa socmed ngayon. May social unrest.

Nag-ugat ang ‘kaguluhan” sa inihain na panukalang-batas na House Bill 6398, o Maharlika Wealth Fund o Sovereign Wealth Fund (SWF). Principal authors ng panukala sina Speaker Martin Romualdez, pinsan ni Pangulong Ferdinand Marcos Jr., at ni House Deputy Leader Ferdinand Alexander Marcos, anak ng pangulo. 

Sa naturang panukala, magiging chairperson ng itatatag na Maharlika Wealth Fund Corporation ang mismong pangulo ng bansa.

Manggagaling ang seed money o inisyal na pondo ng proposed investment fund na P275 bilyon mula sa Government Service Insurance System (GSIS), sa Social Security System (SSS), sa Land Bank of the Philippines (LBP) at Development Bank of the Philippines (DBP) at Home Development Mutual Fund (HDMF).

Magandang adhikain, kuwestiyonableng tunguhin.

Hindi na bago sa pandinig ang salitang “maharlika”. Paboritong salita ito ng angkan ng yumaong Ferdinand Marcos dahil ayon sa kuwento ng mga Marcos, pinangunahan ng yumaong presidente ang Maharlika Guerilla Unit na lumaban sa puwersa ng mga Hapones noong Ikalawang Digmaang Pandaigdig. 

Ngunit ayon sa mga historian, gawa-gawang pagkabayani ang naratibong ito ng mga Marcos dahil lumitaw ang totoong lider ng gerilya unit diumano ay “inagawan” ng kaukulang pagkilala.

May bahid ng iregularidad, kung ganun, ang salitang maharlika. Dahilan kung bakit anumang bagay na ikabit sa salitang ito ay nagiging kuwestiyonable.

Kuwestiyonable din ang sinumang sususog dito. Suportado ng dating Pangulong Gloria Macapagal-Arroyo ang Maharlika Fund. Ang pag-endorsong ito ay tinitingnan ng mga kritiko ng panukalanag batas na affirmation ng maitim na balak ng mga proponent ng batas. 

Matatandaang naakusahan ng plunder ang dating pangulo. Naabsuwelto siya hindi dahil hindi siya napatunayang guilty kundi dahil hindi maituro ng mga testigo ang “main plunderer” sa kaso. Noong 2016, nang maupo si Pangulong Rodrigo Roa-Duterte, nagulat ang marami nang mapabalita ang pag-absuwelto kay Arroyo.

Unconstitutional

Sa taya ni dating mahistrado Antonio Carpio, unconstitutional ang Maharlika Fund. Inugnay niya ito sa isang probisyon sa Saligang Batas na “Article 3, Section 9. Private property shall not be taken for public use without just compensation.” Ayon kay J. Carpio, personal na kontribusyon ng bawat miyembro ng SSS, HDMF at GSIS ang salapi mula rito, at ang paggamit dito ng gobyerno ay hindi sumasang-ayon sa isinasaad ng batas.

Sa paningin naman ni Albay Representative Joey Salceda, ang pondo ay para sa public purpose, at hindi dapat mangamba ang mga miyembro ng mga naturang ahensya dahil babalik sa kanila ang anumang kita mula sa naturang investment fund.

Humihiling ang ilang mambabatas na magkaroon pa ng public consultation upang pag-aralan ang House Bill 6398. Ito ay higit lalo dahil sa walang representasyon mismo mula sa hanay ng ordinaryong tao. Nangangamba sila na matulad ang Maharlika Fund sa Coco Levy Fund na pinamahalaan ng mga politiko at hanggang ngayon ay hindi pa napapakinabangan ng mismong coconut farmers.

Subalit aprubado na umano in principle ang naturang panukala. 

Pondo Para Kanino?

Usapin ng tiwala o public trust ang Maharlika Fund.

Ang nililikhang ingay nito sa socmed sa ngayon kung saan laganap ang galit, pangamba at indignasyon ng netizens ay nakaugat sa sistematikong kasaysayan ng pandarambong ng mga politiko na minsan nang nairekord ang mga pangalan sa usapin ng pangungulimbat sa kaban ng bayan. Ipagkakatiwala ba natin ang public funds na hawakan at ipamuhunan ng mga politikong ito na ni hindi natin ibinoto dahil sa kanilang madilim na nakaraan?

Garapal at brutal na pang-iinsulto sa taumbayan ang pagtatatag ng isang investment corporation na etsa-puwera mismo ang mamamayang unang apektado nito.

Maging mga retirees ay tutol sa Maharlika Fund at nagbabantang i-withdraw in lump sum ang kanilang naipon na pension. Nagpahayag na rin ng pagtutol ang maraming indibidwal at nagnanais nang kunin ang kanilang mga kontribusyon sa SSS at GSIS.

Social unrest, bank run at iba pang inconveniences ang nililikha at possible consequences ng Maharlika Fund. Nais nitong i-eksploit ang lehitimong pangangailan ng gobyerno ng pinansiya sa pamamagitan ng pagkontrol sa mga ahensiyang pinopondohan ng ordinaryong mamamayan. Bakit lagi’t lagi ay ordinaryong mamamayan ang nais hingan ng sakripisyo? Bakit hindi sila mismong mga nakaupo na may mga kaso ng tax fraud at corrupt practices act?

May hangganan ang pagtitimpi ng taumbayan. Huwag antayin ang panahong nanaisin muli nilang manindigan at magpasya.

Huwag ako. Huwag sila.

Huwag kami.

Para sa reaksyon o komento at tanong mag-email sa admin@pinoypubliko.com


Comments

Post a Comment

Popular posts from this blog

Bilyonaryong baon sa utang pinalalayas sa mansion?

Image
MINSAN akala natin ay masarap ang pakiramdam ng mga nakatira sa mga exclusive villages at napapaligiran ng mga mayayamang kaibigan. Hindi pala lahat ng nakikita natin sa ilan sa kanila ay totoo. Tulad na lamang sa kwento ng buhay ng isang super-rich na real estate executive na ayon sa aking spotter ay halos hindi na makatulog sa laki ng problema. Bukod kasi sa hindi na n’ya mabayaran ang upa sa tinutuluyan niyang mansion sa isang exclusive village sa Makati City ay malapit na ring mabatak ang mga ipinagyayabang niyang mga sports car at mamahaling SUVs. Sinabi ng aking mayamang spotter na sobra ang luho sa pamumuhay ng ating bida at halos linggo-linggo kung magpa-party sya kasama ang mga kapwa super-rich at ilang foreign diplomats. Bagama’t malaki ang kita ng kumpanyang minana niya mula sa kanyang mga magulang ay hindi ito sapat para masustain ang kanyang maluhong pamumuhay. Pati ang may-ari ng inuupahan niyang mansion ay napipikon na rin sa puro pangakong iniiwan ng ating bida....
Read more

Pari arestado sa panggagahasa sa dalagita

Image
SHOOT sa kulungan ang isang pari sa Solana, Cagayan dahil sa paulit-ulit umano nitong panggagahasa sa dalagitang youth minister ng simbahan. Kinilala ang pari na si Rev. Fr. Karole Reward Israel, assistant parish priest ng St. Vincent Ferrer sa Solana at residente ng Brgy. Tucalana, Lal-lo, Cagayan. Ayon sa biktima, 16, hindi niya agad isinumbong ang pari dahil natatakot siya sa banta nito na ikakalat ang video na kinuhanan nang palihim nang una siyang gahasain. Sinabi ng biktima na una siyang pinagsamantalahan ng pari sa isang motel noong Pebrero. Ilang beses na naulit ang panggagahasa sa motel, sa sasakyan ng suspek at sa loob ng mismong simbahan. Matapos ang pinakahuling insidente nitong Oktubre 15 ay nagdesisyong isiwalat ng biktima sa kanyang mga guro ang ginagawa sa kanya ni Israel. Humingi naman ng tulong ang mga guro sa National Bureau of Investigation na nagsagawa ng operasyon laban sa pari. Nang isakay ni Israel ang dalagita sa kanyang sasakyan nitong Martes ay sinun...
Read more

Estudyante hindi na libre sa LRT-2

Image
SIMULA bukas, Nobyembre 6, may bayad na ang mga estudyante sa pagsakay sa LRT-2. Ayon sa Light Rail Transit Authority, maaari namang mag-avail ang mga mag-aaral sa 20 percent discount kahit wala na silang libreng sakay. “Simula ika- 6 ng Nobyembre ang mga estudyante ay maaaring mag-avail ulit ng 20% discount. Ipakita lamang ang school ID o proof of enrollment sa Passenger Assistance Office o Ticket booth,” ayon sa ahensya. Kaugnay nito, inihayag ng LRTA na umabot sa mahigit 1.5 milyong estudyante ang nakinabang sa programa. “Sa ngayon umabot na sa 1,527,219 ang nakinabang sa libreng sakay ng LRT-2 sa loob ng 58 na araw simula nang ipatupad ang programa,” ayon sa LRTA. Matatandaang ipinatupad ang libreng-sakay noong Agosto 22 para makatulong sa mga estudyante na naapektuhan ang pag-aaral ng pandemya gayundin ng mga magulang sa gitna ng tumataas na presyo ng gasolina at pangunahing bilihin.
Read more